தமிழ்த் திரையுலகிற்குப் பெருமை சேர்க்கும் வகையில், சர்வதேச அளவில் புகழ்பெற்ற 54-வது சர்வதேச எம்மி விருது வழங்கும் விழாவில் விருது வழங்கும் நபர்களில் ஒருவராக நடிகர் விஜய் சேதுபதி பங்கேற்க உள்ளார்.
தமிழ்த் திரைப்பட உலகில் தனக்கென தனி அடையாளத்தையும், உலகம் முழுவதும் ரசிகர்களையும் கொண்டுள்ள நடிகர் விஜய் சேதுபதிக்கு சர்வதேச அளவில் மற்றுமொரு முக்கிய அங்கீகாரம் கிடைத்துள்ளது. அமெரிக்காவின் நியூயார்க் நகரில் வரும் நவம்பர் 23-ஆம் தேதி நடைபெறவுள்ள 54-வது சர்வதேச எம்மி விருது வழங்கும் விழாவில் (54th International Emmy Awards 2026) விருது வழங்கும் நபர்களில் ஒருவராக அவர் தேர்வு செய்யப்பட்டுள்ளதாகத் தகவல்கள் வெளியாகியுள்ளன. இதற்கான தகவலை ஹாலிவுட் ரிப்போர்ட்டர் இந்தியா உள்ளிட்ட ஊடகங்கள் வெளியிட்டுள்ளன.
உலக அளவில் தொலைக்காட்சித் தொடர்கள், பொழுதுபோக்கு நிகழ்ச்சிகள், ஆவணப்படங்கள் உள்ளிட்ட பல்வேறு படைப்புகளுக்கு அங்கீகாரம் வழங்கும் மிக முக்கியமான விருது நிகழ்வாக சர்வதேச எம்மி விருதுகள் கருதப்படுகின்றன. உலகின் பல்வேறு நாடுகளைச் சேர்ந்த கலைஞர்கள், இயக்குநர்கள், தயாரிப்பாளர்கள் மற்றும் திரைத்துறைப் பிரபலங்கள் இந்த விழாவில் பங்கேற்பது வழக்கம்.
இந்நிலையில், தமிழ் திரைப்படங்களில் மட்டுமின்றி பிற மொழித் திரைப்படங்களிலும் தனது தனித்துவமான நடிப்புத் திறமையை வெளிப்படுத்தி வரும் விஜய் சேதுபதி, இந்த சர்வதேச மேடையில் விருது வழங்கும் பொறுப்பைப் பெறுவது தமிழ் ரசிகர்களிடையே மகிழ்ச்சியை ஏற்படுத்தியுள்ளது.
இதனிடையே, விஜய் சேதுபதிதான் சர்வதேச எம்மி விருது வழங்கும் விழாவில் பங்கேற்கும் முதல் இந்தியர் என சில ஊடகங்களில் வெளியான தகவலுக்கு நடிகை பிரேர்ணா வான்வாரி மறுப்பு தெரிவித்துள்ளார். ஏற்கெனவே நடிகைகள் சிமோன் சிங், ஆஷ்கா கோராடியா மற்றும் பிரேர்ணா வான்வாரி ஆகியோர் வெவ்வேறு ஆண்டுகளில் சர்வதேச எம்மி விருது வழங்கும் நிகழ்ச்சியில் பங்கேற்றுள்ளதாக அவர் சுட்டிக்காட்டியுள்ளார். குறிப்பாக, 2012-ஆம் ஆண்டு நடைபெற்ற 40-வது சர்வதேச எம்மி விருது விழாவில் தானும் விருது வழங்கியதாகப் புகைப்பட ஆதாரத்துடன் தெரிவித்துள்ளார். எனவே, விஜய் சேதுபதியை முதல் இந்திய விருது வழங்குநர் என்று குறிப்பிடுவது வரலாற்றுத் தகவல்களுடன் பொருந்தாது என்ற விவாதம் எழுந்துள்ளது.
இந்த ஆண்டு நடைபெறவுள்ள விழாவில் இந்தியாவுக்கும் கூடுதல் சிறப்பு கிடைத்துள்ளது. சோனி லைவ் தளத்தில் வெளியான ‘ரியல் காஷ்மீர் கால்பந்து கிளப்’ என்ற தொடர் சிறந்த நாடகத் தொடர் பிரிவிலும், நகைச்சுவைக் கலைஞர் வீர்தாஸின் ‘ஃபூல் வால்யூம்’ நிகழ்ச்சி சிறந்த நகைச்சுவைத் தொடர் பிரிவிலும் பரிந்துரைக்கப்பட்டுள்ளன.
ஏற்கெனவே 2023-ஆம் ஆண்டு வீர்தாஸ் தனது ‘விர்தாஸ்: லேண்டிங்’ நிகழ்ச்சிக்காக சர்வதேச எம்மி விருதைப் பெற்றதுடன், 2024-ஆம் ஆண்டு நடைபெற்ற விழாவைத் தொகுத்து வழங்கிய முதல் இந்தியக் கலைஞர் என்ற பெருமையையும் பெற்றிருந்தார்.
திரைப்படங்களில் வித்தியாசமான கதாபாத்திரங்களைத் தேர்ந்தெடுத்து நடித்து வரும் விஜய் சேதுபதிக்கு, சர்வதேச விருது மேடையில் கிடைத்துள்ள இந்த வாய்ப்பு அவரது கலைப்பயணத்தில் மற்றுமொரு குறிப்பிடத்தக்க நிகழ்வாக அமைந்துள்ளது. ஒருபுறம் இந்தியப் படைப்புகள் விருதுப் போட்டியில் இடம்பெற்றுள்ள நிலையில், மறுபுறம் தமிழ் நடிகர் ஒருவர் சர்வதேச மேடையில் விருது வழங்கும் பொறுப்பைப் பெறுவது இந்தியத் திரைத்துறையின் சர்வதேச வளர்ச்சியை எடுத்துக்காட்டுவதாக அமைந்துள்ளது.
நவம்பர் 23-ஆம் தேதி நியூயார்க்கில் நடைபெறவுள்ள சர்வதேச எம்மி விருது விழையை இந்தியத் திரையுலகமும், குறிப்பாகத் தமிழ் ரசிகர்களும் ஆவலுடன் எதிர்பார்த்துக் காத்திருக்கின்றனர்.
