காட்பாடி மாநகராட்சி மண்டலம் 1-ல் 15 வார்டுகளிலும் தீவிரத் தூய்மைப் பணி – ஒரே நாளில் 5,700 கிலோ பட்டாசுக் கழிவுகள் அகற்றம்!
வேலூர் மாவட்டம், காட்பாடி பகுதியில் தீபாவளிப் பண்டிகையை முன்னிட்டு பொதுமக்கள் வெடித்த பட்டாசுகளால் சாலைகள் மற்றும் தெருக்களில் குவிந்த கழிவுகளை, தூய்மைப் பணியாளர்கள் ஒரே நாளில் சுமார் 5.7 டன் (5,700 கிலோ) அளவிற்கு அகற்றி சாதனை படைத்துள்ளனர்.
வேலூர் மாநகராட்சிக்கு உட்பட்ட காட்பாடி மண்டலம் 1-ல் உள்ள 15 வார்டுகளிலும் தூய்மைப் பணியாளர்கள் தீவிரமாகத் தூய்மைப் பணியில் ஈடுபட்டனர். தீபாவளியன்று பொதுமக்கள் வெடித்த பட்டாசுகளால் உருவான கழிவுகள் தனியாகச் சேகரிக்கப்பட்டு 5.7 டன் அளவிற்கு அகற்றப்பட்டன. இதனுடன், வீடுகள் மற்றும் கடைகளிலிருந்து வழக்கமாகச் சேகரிக்கப்படும் மக்கும், மக்காத குப்பைகள் என மொத்தம் 43 டன் கழிவுகளும் சேகரிக்கப்பட்டு உரிய முறையில் அப்புறப்படுத்தப்பட்டன.
பொதுமக்கள் மகிழ்ச்சியாகப் பண்டிகையைக் கொண்டாடி ஓய்வெடுக்கும் வேளையில், அடுத்த நாள் அதிகாலையிலேயே களமிறங்கி, தங்களது குடும்பத்தையும் தனிப்பட்ட ஓய்வையும் மறந்து பொதுமக்களின் சுகாதாரத்தையும் சுற்றுப்புறத் தூய்மையையும் பாதுகாக்கும் உன்னதப் பணியில் ஈடுபடுபவர்கள்தான் தூய்மைப் பணியாளர்கள்.
வெயில், மழை, பண்டிகை, விடுமுறை என எதையும் பொருட்படுத்தாமல், நகரின் தூய்மைக்காகத் தொடர்ந்து உழைக்கும் இவர்களின் சேவை உண்மையிலேயே போற்றுதலுக்குரியது. தீபாவளிப் பண்டிகைக்குப் பிறகு குப்பைகள் தேங்காமல் விரைந்து அகற்றிய இவர்களின் அர்ப்பணிப்பான பணியைப் பொதுமக்கள் வெகுவாகப் பாராட்டி வருகின்றனர்.
தூய்மைப் பணியாளர்கள் வெறும் குப்பைகளை அகற்றுபவர்கள் மட்டுமல்ல; நோய்கள் பரவாமல் தடுத்து, பொதுமக்களின் ஆரோக்கியத்தையும் நகரின் சுற்றுச்சூழலையும் காக்கும் உண்மையான மக்கள் சேவகர்கள். எனவே, அவர்களின் உழைப்பை மதித்து வணங்குவதுடன், குப்பைகளைச் சாலைகளில் வீசாமல் முறையாகப் பிரித்துக் கொடுத்து, அவர்களின் பணிக்கு ஒத்துழைப்பு வழங்க வேண்டியது ஒவ்வொரு குடிமகனின் கடமையாகும்.
எந்த நிகழ்வாக இருந்தாலும் மறுநாள் நமது நகரம் தூய்மையாக இருக்க வேண்டும் என்பதற்காக உழைக்கும் இந்த உன்னத மனிதர்களைப் போற்றுவோம்; அவர்களின் சேவைக்கு என்றும் தலைவணங்குவோம்!
மாவட்டச் செய்தியாளர்: ஆர்.ஜே. சுரேஷ்குமார்
தொடர்பு எண்: 9150223444
