ராமநாதபுரம் மாவட்டம், திருவாடானை உட்கோட்டம், எஸ்.பி.பட்டினம் காவல் நிலைய எல்லைக்குட்பட்ட பாசிப்பட்டினம் பகுதியில் 19.8 கிலோ கிராம் ஹஷீஷ் போதைப்பொருளைக் காவல்துறையினர் பறிமுதல் செய்து, ஏற்கனவே போதைப்பொருள் கடத்தல் வழக்குகளில் தொடர்புடைய தலைமறைவு குற்றவாளியைக் கைது செய்துள்ளனர்.
கடந்த 03.11.2026 அன்று பிற்பகல் சுமார் 12.50 மணியளவில், பாசிப்பட்டினம் பாசியம்மன் கோவில் கடற்கரைப் பகுதியில் சட்டவிரோதமாகப் போதைப்பொருள் கடத்தப்படுவதாக எஸ்.பி.பட்டினம் காவல் ஆய்வாளர் டேவிட் ரவிராஜனுக்குக் கிடைத்த ரகசியத் தகவலின் அடிப்படையில், அவரது தலைமையிலான தனிப்படைக் காவல்துறையினர் சம்பவ இடத்திற்குச் சென்று தீவிரக் கண்காணிப்பில் ஈடுபட்டனர்.
அப்போது சந்தேகத்திற்கிடமான முறையில் சுற்றித்திரிந்த நபரைப் பிடித்து சோதனை செய்தபோது, அவரிடமிருந்து 2 கிலோ கிராம் ஹஷீஷ் போதைப்பொருள் பறிமுதல் செய்யப்பட்டது. தொடர்ந்து அவரிடம் மேற்கொள்ளப்பட்ட விசாரணையின் அடிப்படையில், அவரது வீட்டில் சோதனை நடத்தி மேலும் 17.8 கிலோ கிராம் ஹஷீஷ் போதைப்பொருளைக் காவல்துறையினர் கைப்பற்றினர். இதன் மூலம் ஒரே நடவடிக்கையில் மொத்தம் 19.8 கிலோ கிராம் ஹஷீஷ் பறிமுதல் செய்யப்பட்டுள்ளது.
கைது செய்யப்பட்ட நபர் யார்?
கைது செய்யப்பட்டவர் திருவாடானை வட்டம், தளிர் மருங்கூர் பகுதியைச் சேர்ந்த அந்தோணி சேவியர் என்பவரின் மகன் மனோ (34) என்பது விசாரணையில் தெரியவந்துள்ளது.
இவர் மீது ஏற்கனவே தொண்டி காவல் நிலையத்தில் குற்ற எண் 88/2025-ன் கீழ் போதைப்பொருள் தடுப்புச் சட்டத்தின் பிரிவுகள் 8(c), 20(b)(ii)(B)-ன் கீழ் வழக்குப் பதிவு செய்யப்பட்டுள்ளது. மேலும், எஸ்.பி.பட்டினம் காவல் நிலையத்தில் குற்ற எண் 08/2026-ன் கீழ் இதே சட்டப்பிரிவுகளின்படி வழக்குப் பதிவு செய்யப்பட்டு, அந்த வழக்கில் 15 கிலோ கஞ்சா பறிமுதல் செய்யப்பட்டிருந்தது. அந்த வழக்கில் மனோ தலைமறைவாக இருந்து வந்ததாகக் காவல்துறை தரப்பில் தெரிவிக்கப்பட்டுள்ளது.
தற்போது 19.8 கிலோ ஹஷீஷ் போதைப்பொருள் பறிமுதல் செய்யப்பட்ட சம்பவம் தொடர்பாக, எஸ்.பி.பட்டினம் காவல் நிலையத்தில் குற்ற எண் 159/2026, NDPS சட்டப்பிரிவுகள் 8(c), 20(b)(ii)(C)-ன் கீழ் வழக்குப் பதிவு செய்யப்பட்டுள்ளது. கைது செய்யப்பட்ட மனோவை காவல்துறையினர் சட்டப்பூர்வ நடவடிக்கைகளுக்காகக் காவல் நிலையத்திற்கு அழைத்துச் சென்றுள்ளனர்.
தலைமறைவாக இருந்து வந்த போதைப்பொருள் வழக்கில் தொடர்புடைய நபர் கைது செய்யப்பட்டதுடன், பெருமளவிலான ஹஷீஷ் போதைப்பொருளும் பறிமுதல் செய்யப்பட்டுள்ள சம்பவம் அப்பகுதியில் பரபரப்பை ஏற்படுத்தியுள்ளது.
